《文字輔導專業訓練》系列
AI 模擬文字輔導：與虛擬案主進行輔導練習
試想像你能運用剛剛看過的技巧，在非常疑真的環境下跟不同背景的案主以文字方式輔導？我們的 AI 模擬文字輔導器正正是能滿足你想像的工具。
這個課題會介紹由心亮閣團隊所製作的 AI 模擬文字輔導練習工具，並了解它如何能協助你磨練文字輔導技巧。你可以透過由 AI 扮演，與擁有不同背景和困擾的模擬案主進行一節完整的會談，就像在真實的輔導環境中一樣。
模擬器的特點
你可能會問：為什麼要用這個模擬器，而不直接用 ChatGPT 或者其他 AI 工具？它有以下幾個特點：
- 更貼近真人的互動：AI 案主可能會一次過發出多個訊息、隔很久才回覆、突然離線，或者在你準備結束時才說出最重要的事，就像真實的對話一樣。
- 對你的文字有真實反應：句號、單字回覆、太長的訊息、不合時宜的 emoji，以至回覆得太慢，都會影響案主接下來願意說多少。
- 包含危機評估的練習：部份案主帶有危機風險。你有沒有留意、有沒有直接詢問、結束前有沒有再次確認，報告都會逐項檢視。
- 按課程內容撰寫的分析報告：報告會按三步框架、網上臨在感、用字語氣、節奏及安全評估給予評語，並讓你看到案主當時沒有說出口的想法，亦可以即場重寫訊息再取得評語。
- 度身設計的 AI 指令：模擬器以進階的提示工程設計，務求帶來高度真實的體驗。
- 完全免費：使用模擬器是完全免費的。
示範
以下是一位真人輔導人員使用這模擬器與 AI 案主對話的真實互動，以及 AI 生成的分析報告。
💡 邊讀邊想
這段示範展示的是工具如何運作，並不是展示何謂「標準輔導」。閱讀時，試試對照前兩個課題的三步框架：開始階段有沒有交代時間和確立焦點？中間階段讓案主帶走了什麼？結束階段有沒有預告、總結和肯定進展？然後再看看 AI 的報告，你同意它的評語嗎？
對話紀錄
19:05
你好，我係 Nicholas，係 ABC 輔導中心嘅輔導員
請問我可以點樣稱呼你阿？
19:05
Hi Nicholas，你可以叫我 Sophie 😊
話說我係大學生，第一次搵人傾，所以會有少少緊張
19:06
有少少緊張係好正常㗎 😊
Sophie，係咩令你今日想上嚟同我傾阿？
19:06
我嚟主要係因為最近覺得好焦慮
特別係考試壓力，同埋喺大學要識好多新嘅人
希望可以學到啲方法處理我嘅擔心，同埋建立返啲自信 😊
19:07
考試同識新朋友，兩樣都的確可以令人面對幾大壓力呀...
我哋大約有一個鐘時間，你會想集中傾考試多啲呀，定係識新朋友多啲？
19:08
我諗我想先集中傾考試壓力
因為啲壓力最近真係壓到我透唔到氣 😔
遲啲可能都可以傾吓我對識新朋友嘅感覺
19:09
冇問題！你希望我可以畀啲貼士你，而我亦想了解多啲你嘅壓力
可唔可以講多啲你嘅考試壓力？例如係覺得自己準備唔足、想考得好嘅壓力，定係其他原因呢？
19:09
我嘅考試壓力主要係因為我有時覺得自己準備唔足 😰
19:10
同埋有好大壓力一定要成功。因為我係屋企第一個入大學嘅人，所以一定要完美
呢樣嘢令我咩都諗過龍，好驚達唔到大家嘅期望 😔
19:11
係呀……想達到期望都係好正常㗎
係呢，你讀緊year幾同埋係讀major呢？
19:11
我係心理學系一年級生 😊
19:12
心理學好有趣，但都唔容易！呢個係你喺大學嘅第一個考試嚟？
19:12
係呀，係我喺大學第一個考試 😊 我真係好緊張，因為我成日覺得自己準備唔足，又擔心達唔到大家嘅期望 😰。
19:13
你提到其中一個原因，係你係屋企第一個入大學嘅人。你中學應付考試嗰陣，都會擔心達唔到期望嗎？
19:13
中學嗰陣我間中都會擔心，但冇而家咁勁
因為嗰陣冇咁多期望 😰
而家做咗屋企第一個大學生，令我覺得自己一定要完美
壓力就更加大
19:14
明白……你屋企人知唔知你有呢種感覺呢？
19:14
我通常只會同媽媽講學校普通日常嘅嘢
所以我又冇真係講過自己有幾大壓力 😔
我驚佢唔明，又或者只會令壓力更大
19:15
你意思係會令你自己壓力更大，定係令媽媽壓力更大呢？
19:16
我諗兩樣都係 😥。我驚講出嚟會令媽媽有壓力，之後我又會因為咁而更加焦慮。
19:16
聽落你都好照顧媽媽嘅感受，但同時呢樣嘢亦加重咗你自己嘅壓力
19:17
我真係覺得自己成日都想保護媽媽
而呢樣嘢畀咗我好大壓力 😥
有時好難平衡，一邊係自己嘅擔心，一邊係唔想令佢更有壓力
19:18
你好為佢著想呢...
但同時，佢有冇都表示過支持？
19:19
我諗媽媽係有支持我嘅，雖然佢唔會好直接咁講出口 😊
我有時會留意到啲小動作，但又唔係次次都肯定
所以我會懷疑佢其實有幾proud of me
19:19
令佢開心、為你驕傲，對你嚟講重要嗎？
19:20
係呀，令媽媽開心同驕傲對我嚟講真係好重要 😊
我成日覺得自己要完美，佢先會繼續為我驕傲
呢樣嘢有時令我擔心得比我想嘅多
19:20
明白……所以你先會咁擔心個考試..
令你擔心得比你想像中嘅多？
19:20
係呀，冇錯 😰
19:21
我真係好擔心個考試，覺得自己一定要完美，唔可以令任何人失望
特別係媽媽
有時真係好大壓力
係呀，有時真係令我擔心得比我想嘅多好多
因為我不停諗住唔可以令媽媽失望 😰
我成日諗過龍，諗住要完美，結果壓力越嚟越大
19:22
係....
你有冇試過有一次好似達唔到佢嘅期望？佢當時有咩反應呢？
19:22
我記得有一次我有份 project 比較低分 😔
19:23
媽媽嗰陣好靜，我唔肯定佢係咪失望，但已經令我好焦慮，驚自己達唔到佢嘅期望
19:24
照你所講佢嘅反應，聽落媽媽又唔係成日都有好高嘅期望
所以對你嚟講，好似一個估估吓嘅遊戲，你唔係次次都估到佢會點反應
19:24
有時真係好似估估吓……我永遠都唔肯定自己達唔達到佢嘅期望 😥。呢樣嘢真係令我諗過龍，亦加重咗考試壓力。
19:26
如果 1 至 10 分，10 分係最高，你覺得「我考呢個試主要係為咗達到佢嘅期望」呢句說話有幾真呢？
19:26
我會話大約 8 分 😰
我成日覺得自己要完美，媽媽先會為我驕傲
呢個壓力真係令考試壓力大咗好多
19:27
係呀……我感覺到嗰個壓力真係唔細……
有冇啲咩令你畀 8 分，而唔係 9 分或者 10 分呢？
19:27
我諗畀 8 分係因為有時我都會覺得安心少少
19:28
例如當我留意到媽媽啲小小嘅支持，或者我令到自己冷靜少少嘅時候
雖然壓力仍然喺度 😰。唔係全部都係壓力
而係擔心入面夾雜住短暫嘅放鬆，所以未去到滿分
19:29
好高興佢嘅支持令你覺得平靜啲
入咗大學呢幾個月，你有冇留意到媽媽嗰啲小小嘅支持？
19:29
有呀，媽媽有時會 send 啲短訊嚟問我今日過成點
或者簡單一句「掛住你」😊，令我平靜少少
19:30
雖然我會諗得太多
19:31
係呀……媽媽用佢自己嘅方式支持緊你
你覺得個考試好重要，咁除此之外，你覺得佢仲有冇其他嘢為你驕傲㗎？
19:31
我諗媽媽都為我咁努力、同埋我有試下照顧自己而驕傲
唔只係考得好 😊 有時收到佢一個短訊
會令我覺得佢關心嘅係我整體嘅進步
而唔只係學業上要完美
19:32
係呀，你感受到媽媽雖然可能都在意個考試，但其實佢都好重視成個過程
最重要嘅係，你一直都感受到佢真係明白你有幾努力
19:36
Sophie，你仲喺度嗎？
19:36
喺度呀 😊。唔好意思遲咗覆，我頭先整理緊自己啲諗法
19:37
唔緊要！好高興你感受到佢真係明白你有幾努力，亦知道佢欣賞嘅係成個你，而唔只係學業
19:38
我頭先一直諗返我哋傾過嘅嘢
19:39
知道媽媽就算用好細微嘅方式都支持緊我，真係有幫助
19:39
係呀……而家你知道咗呢啲，你對個考試有咩感覺呢？
19:39
我仍然好緊張，仍然覺得呢個試要考到完美 😰
19:40
但同時，我留意到媽媽嗰啲小小嘅支持，令我平靜咗少少 😊
19:40
我知唔容易，特別係呢個係你大學第一個考試……
係呢，你幾時考試？
19:40
我星期二考 😰
真係好緊張
希望捱得過
19:43
希望諗起媽媽嘅支持會幫到少少
不如今個星期五再同我傾一次？到時我哋可以傾吓處理壓力嘅方法
19:43
星期五得呀 😊
好期待考試前可以學到啲處理壓力嘅貼士，多謝！
19:44
唔使客氣！夜晚 8 點好唔好？
19:44
星期五夜晚 8 點得呀 😊
好期待到時再傾
同埋喺考試前傾吓處理壓力嘅貼士！
19:45
我都好期待！你想留低電話號碼等我 send 短訊提你，定係星期五夜晚 8 點直接返嚟呢度？
19:45
我想星期五夜晚 8 點直接返嚟呢度 😊
多謝你畀我揀！
19:46
OK，冇問題。到時傾 😊
拜拜，祝你有個愉快嘅晚上！
19:46
你都係！
AI 分析報告：逐句評語
| 輔導人員的訊息 | AI 評語 |
|---|---|
| 你好，我係 Nicholas，係 ABC 輔導中心嘅輔導員 | 不錯的開場，清楚交代了身份，但可以多一點個人化的元素去建立關係。 |
| 請問我可以點樣稱呼你阿？ | 友善的做法，邀請案主分享自己的名字，有助建立連結。 |
| 有少少緊張係好正常㗎 😊 | 溫暖地回應了案主的感受，emoji 令語氣更友善。 |
| Sophie，係咩令你今日想上嚟同我傾阿？ | 有效的提問，邀請案主說出自己的困擾。 |
| 考試同識新朋友，兩樣都的確可以令人面對幾大壓力呀... | 有效地肯定了案主的感受，並鼓勵進一步探索。 |
| 我哋大約有一個鐘時間，你會想集中傾考試多啲呀，定係識新朋友多啲？ | 釐清了會談的焦點，為會談提供了結構。 |
| 冇問題！你希望我可以畀啲貼士你，而我亦想了解多啲你嘅壓力 | 重申了案主的目標，保持聚焦。 |
| 可唔可以講多啲你嘅考試壓力？例如係覺得自己準備唔足、想考得好嘅壓力，定係其他原因呢？ | 有效地邀請案主詳細說明，讓困擾可以被更深入地探索。 |
| 係呀……想達到期望都係好正常㗎 | 肯定了案主的感受，但可以多回應對方獨特的經歷。 |
| 係呢，你讀緊year幾同埋係讀major呢？ | 輕鬆的提問有助建立關係，但可能稍為偏離了聚焦的對話。 |
| 心理學好有趣，但都唔容易！呢個係你喺大學嘅第一個考試嚟？ | 正面地回應了案主的主修科，促進連結。 |
| 你提到其中一個原因，係你係屋企第一個入大學嘅人。你中學應付考試嗰陣，都會擔心達唔到期望嗎？ | 有效地運用反映，把過去的經驗與當下的感受連結起來。 |
| 明白……你屋企人知唔知你有呢種感覺呢？ | 有效地繼續探索案主的支援系統。 |
| 聽落你都好照顧媽媽嘅感受，但同時呢樣嘢亦加重咗你自己嘅壓力 | 很好地指出了案主在家庭關係中的角色。 |
| 令佢開心、為你驕傲，對你嚟講重要嗎？ | 重要的探索式提問，觸及案主的動機。 |
| 係呀……我感覺到嗰個壓力真係唔細…… | 嘗試肯定情緒，但用字可以更清晰；省略號可能顯得猶豫。 |
| 如果 1 至 10 分，10 分係最高，你覺得「我考呢個試主要係為咗達到佢嘅期望」呢句說話有幾真呢？ | 善用評分問句把案主的感受量化，促進自我反思。 |
| 好高興佢嘅支持令你覺得平靜啲 | 回應了案主經驗中正面的部份，有助取得平衡。 |
| 係呀，你感受到媽媽雖然可能都在意個考試，但其實佢都好重視成個過程 | 有效的總結，鞏固了案主的領悟。 |
| Sophie，你仲喺度嗎？ | 確認案主是否在線是好的，能確認案主依然在。 |
| 係呀……而家你知道咗呢啲，你對個考試有咩感覺呢？ | 鼓勵案主整合自己的領悟，但措辭可以更正面。 |
| 希望諗起媽媽嘅支持會幫到少少 | 為案主的處境提供了正面的重新框架。 |
| 不如今個星期五再同我傾一次？到時我哋可以傾吓處理壓力嘅方法 | 順利地過渡到結束，並訂立下一步。 |
| 我都好期待！你想留低電話號碼等我 send 短訊提你，定係星期五夜晚 8 點直接返嚟呢度？ | 清晰而專業，為案主提供了選擇。 |
| 拜拜，祝你有個愉快嘅晚上！ | 友善的結語，但「拜拜」可能顯得較隨便。 |
AI 分析報告：整體總結
基本輔導技巧
- 輔導人員有效地肯定了案主的感受，指出焦慮和壓力是正常的。
- 評分問句有助案主把感受量化，促進自我反思。
- 輔導人員鼓勵案主探索家庭關係，這對理解案主的壓力十分關鍵。
- 輔導人員一直努力令案主聚焦於自己的困擾。
網上臨在感
- 輔導人員運用友善的語言和 emoji，建立了溫暖而平易近人的形象。
- 整節會談大致保持投入，但重複的提問令個別時刻略為脫節。
- 輔導人員對案主情緒的回應，營造了具支持性的環境。
- 部份回應如果更個人化，可以更添溫暖。
用字
- 用字大致清晰而具支持性，個別句子略嫌生硬。
- emoji 增添了溫暖和親切感，在文字形式中有其好處。
- 個別較隨便的用語可能削弱專業感，語氣可以更平衡。
- 輔導人員間中使用省略號，可能顯得猶豫而不夠肯定。
會談結構
- 會談有結構地進行，聚焦於案主的考試壓力。
- 輔導人員有效地由探索感受過渡到訂立下一步。
- 部份時刻的話題較零碎，多作總結可以避免這個情況。
- 會談結束時安排了下一次會談，帶來完結感。
錯過了的機會
- 在沉默的時刻，輔導人員應該明確地鼓勵案主慢慢來。
- 可以更深入地釐清案主對母親期望的感受，從而得到更多領悟。
- 可以更頻密地總結重點，鞏固案主的領悟，避免話題零碎。
限制
和所有科技一樣，我們的模擬器都有它的限制：
- 回應始終未必 100% 自然：我們力求重現真實的對話，但 AI 生成的回覆仍然可能有點不太自動。例如在上面的示範中，AI 案主幾乎每個訊息都加上 emoji，有時甚至與內容的情緒不符。
- 沒有督導的環境：對話和報告都是由 AI 生成的。在沒有專業督導的情況下，當中的建議只應視為參考。
- 使用量上限：所有成本由我們承擔，如果使用量超出預算，服務可能會暫時停止。
使用須知
使用模擬器之前，請細閱以下內容：
- 模擬器中所有的姓名和背景均屬虛構，並不代表任何真實人物。如有雷同，純屬巧合。
- 生成的報告只供參考。如需準確的評估，請諮詢有經驗的同工或督導。
- 模擬練習不能取代提供文字輔導之前的正式訓練。我們彭祖你與真人（例如同事或督導）互相練習。
- 請勿在模擬器中輸入任何真實案主的資料或對話內容。
- 我們不會儲存你的對話紀錄或分析報告：它們只存在於你的瀏覽器分頁之中，關閉分頁後就會消失。我們只會記錄使用量（次數及成本），以控制預算。
- 對話內容會傳送到 OpenAI 的 API 以生成案主的回覆及報告。OpenAI 表示不會使用 API 資料訓練模型，但會為監察濫用而保留紀錄最多 30 日。
- 部份模擬案主會提及自殺念頭，這是為了讓你練習安全評估。如果練習期間你自己感到不適，請暫停並尋找支援，。
- 任何誤用或濫用 AI 的行為，會導致永久停用模擬器的資格。
- 如果需求超出預期及預算，我們可能會暫時關閉對話功能。
開始練習
登入模擬器
正在確認登入狀態……